چالاکییەکان

بەمەبەستی ئەنجامدانی كاری هاوبەشی مرۆیی‌ و پەروەردەیی‌ و ژینگەیی‌ و تەندروستی، پڕۆگرامی پێنجوێن شاری فێربوون یاداشتێكی لێكتێگەیشتنی لەگەڵ زانكۆی سلێمانی واژۆكرد. ڕۆژی ٢٨ی تشرینی دووەمی ٢٠٢٤، یاداشتنامەكە لەنێوان (حەبیب مەحمود ساڵح) دامەزرێنەر و ئەندامی بۆردی باڵای پڕۆگرامی پێنجوێن شاری فێربوون و (پ.ی.د.زانا مەحمود) یاریدەدەری سەرۆكی زانكۆی سلێمانی بۆ كاروباری زانستی‌ و خوێندنی باڵا‌ واژۆكرا. لەمیانەی ڕێوڕەسمەكەدا، (پ.ی.د زانا مەحمود) ئاماژەی بەگرنگی پڕۆژەكە كرد و وتی: “هیوادارین ئەم یاداشتنامەیە تەنیا لەسەر وەرەقە نەمێنێتەوە و كاری هاوبەش‌ و ئیشی باشی بەدوادا بێت”. هەر لەوبارەیەوە، (حاجی حەبیب مەحمود ساڵح) ئەندامی بۆردی باڵای پڕۆگرامی پێنجوێن شاری فێربوون لە لێدوانێكدا بۆ “سایتی زانكۆ” وتی: “ئەم هەماهەنگییە لەگەڵ زانكۆی سلێمانی بۆ ئێمە مایەی خۆشحاڵییە، چونكە هەر شوێنێك زانكۆ بۆ كاری پەروەردەیی لای لێبكاتەوە، گرنگی زۆرتری هەیە”. وتیشی: “ئەم پڕۆژەیە كارێكی مرۆییە و دەمانەوێت خزمەتی مرۆڤ بكەین، دڵنیاشین زانكۆی سلێمانی هەر شتێك، كە خزمەتی هاووڵاتیان‌ و ئەم نیشتمانە بكات، گرنگی پێدەدات، بۆیە بەخۆشحاڵییەوە حەزمان كرد ئەم یاداشتی لێكتێگەیشتنە واژۆ بكەین”. جێی باسە، پڕۆگرامی پێنجوێن شاری فێربوون لە ساڵی ٢٠١٨ بە چاندنی نەمام دەستیپێكرد، دواتر پڕۆگرامی پەروەردەیی‌ و تەندروستی بۆ زیادكرا و ڕێكاری كارگێڕی بۆ گیرایەبەر و دەست بەجێبەجێكردنی كرا. لە چوارچێوەی ئەو پڕۆژەیەدا تائێستا ٤١ هەزار نەمام لە شارۆچكەی پێنجوێن چێنراوە، شەش هەزار و حەوت سەد كەسیش، سودمەندبوون لە خولی پەروەردەیی‌ و تەندروستی‌ و ژینگەیی‌ و منداڵان‌ و چەند بوارێكی دیكە.

ئەمڕۆ ڕێکەوتی ٧- ١١ - ٢٠٢٤ بە ئامادەبوونی بەڕێز (هێمن ئیبراهیم) قائمقامی قەزای پێنجوێن بە وەکالەت و شاندێک کە پێک هاتبوون لە ژمارەیەک لە ئەندامانی سەرپەرشتیارانی پڕۆگرامی پێنجوێن شاری فێربوون سەردانی بەڕێز د.هەڤاڵ ئەبوبەکر پارێزگاری سلێمانیان کرد. بەمەبەستی بەدەستهێنانی پشتگیری بەڕێز پارێزگاری سلێمانی تاکو هەوڵبدرێت لە ئایندەدا شارۆچکەی پێنجوێن ببێتە ئەندام لە تۆڕی جیهانی شارە فێربوونەکانی یونسکۆ. لە میانی دیدارەکەدا گفتوگۆ سەبارەت بە دوایین هەوڵەکان بۆ تۆمارکردنی پێنجوێن وەک شارێکی فێربوون لە یونسکۆ کرا و، هەروەها بەشداریکردنی شارەکە لە کۆنفرانسی ساڵانەی یونسکۆ بۆ شارەکانی فێربوون لە جوبەیلی شانشینی سعودیە کە وا بڕیارە لە ئایندەیەکی نزیکدا ئەنجام بدرێت. لەکۆتایشدا بە سوپاسەوە پارێزگاری سلێمانی پاڵپشتی و پێزانینی تەواوی خۆی بۆ پڕۆژەکە دەربڕی.

بەمەبەستی پیرۆزبایی بەدەستهێنانی پلەی یەکەم لەسەر ئاستی زانکۆکانی عێراق ،وەفدێک بەنوێنەرایەتی پڕۆگرامی پێنجوێن شاری فێربوون سەردانی سەرۆکایەتی زانکۆی سلێمانی کرد . لەگەڵ چەپکە گوڵی سەرکەوتن ،پەیامی پیرۆزبایی پڕۆگرامەکەیان پێشکەش بەبەڕێز (پرۆفیسۆر دکتۆر کۆسار محمد) سەرۆکی زانکۆ کرد. ئەمەی خوارەوە دەقی پیرۆزباییەکەیە: پڕۆگرامی پێنجوێن شاری فێربوون پیرۆزبایی پێشكەش بەسەرۆك و سەرجەم مامۆستایان‌و فەرمانبەران‌و خوێندكارانی زانكۆی سلێمانی‌ دەکات، بە بۆنەی بەدەستهێنانی پلەی یەكەم لەسەر ئاستی زانكۆكانی عێراق بەپێی ریزبەندی (Times Higher Education)ی بەریتانی. ئەم سەرکەوتنە ،دەستكەوتێكی گەورەو مێژوییە بۆ شاری سلێمانی بەتایبەتی‌و هەرێمی كوردستان بەگشتی. بەهیوای سەركەوتنی زیاتر بۆ زانكۆی سلێمانی .

بەرواری٢-١٠-٢٠٢٤ سیمینارێکی تایبەت و گرنگ ئەنجامدرا لە لایەن بەڕێز(گەشتیار غریب) دامەزرێنەری پرۆژەی کارسازی شادمان،کە ماوەی سیمینارەکە (٢کاتژمێر)ی خایاند تێیایدا جەختکردن لەسەر بڕیاردان و جۆر و شێوازەکانی بڕیاردانی دروست باس کرا. بە ناوی پڕۆگرامی پێنجوێن شاری فێربوون زۆر سوپاس بۆ بەڕێز(گەشتیار غریب)بۆ کاتەی تەرخانی کرد بەپرۆژە و فێرخوازەکان.

پڕۆگرامی پێنجوێن شاری فێربوون سیمینارێکی تایبەت بە منداڵان و نەوجەوانان، بۆ بەڕێز (هەتاو عزیز) ئەنجامدا، لەم سیمینارەدا منداڵان ئاگادار کرانەوە لە زۆر بەکارهێنانی یارییە ئەلکترۆنییەکان و زیانەکانی و هاوکات چەندین یاری دەروونی ئەنجامدرا و سودێکی تایبەتی بە منداڵان بەخشی .. زۆر سوپاس بۆبەڕێز (هەتاو عزیز) بۆ پێشکەش کردنی سیمینارەکە.

٣-٩-٢٠٢٤ بە ئامادە بوونی ژمارەیەک لە خانمان و لاوانی شارۆچکەی پێنجوێن سیمینارێکی تایبەت لە ژێر ناونیشانی(گەنج و دەرفەتەکان) لە لایەن بەڕێز(د.محمد خانی) سازکرا کە تیایدا باس لە دەرفەتەکانی ژیان و هەوڵدان بۆ باشترکردنی ژیانی گەنجان کرا

بەرواری ٢١-٨-٢٠٢٤ سیمینارێک لەژێر ناونیشانی (چۆن ببینە کەسێکی بەرهەمدار لە کۆمەڵگەدا) تایبەت بە فێرخوازانی خولی فێربوونی (دەف و جواننوسی) لە لایەن (پ.ی.د.عبدالفتاح هەورامی)ەوە پێشکەشکرا. لەم سیمینارەدا باس لە هەنگاو و قۆناغە جیاوازەکانی گەشە و پەرەپێدان و بەرپرسیارێتی تاککرا لە ژیانی خۆی و پاشان کاریگەری لەناوکۆمەڵگەدا.. لەمیانی سیمینارەکەدا منداڵێکی ژیکەڵە بە بەشداری و ووتە جوانەکانی سەرنجی ئامادەبووانی بەلایخۆیدا ڕاکێشاو، بەو هۆیەشەوە لەلایەن پڕۆگرامی پێنجوێن شاری فێربوونەوە وەک هاندانێک خەڵاتێکی پێشکەشکرا..

خانمان پێگە و ڕۆڵی پڕبایەخیان هۆکارە بۆ گرنگی پێدانیان لەلایەن پڕۆگرامی پێنجوێن شاری فێربوونەوە، لەم سۆنگەیەوە بەرواری ٦-٨-٢٠٢٤ لە کتێبخانەی گشتی پێنجوێن سیمینارێکی گرنگ بۆ بەڕێز (د.محمدخانی) لەژێر ناونیشانی (هونەری دایکایەتی و ڕۆڵی خانمان لە کۆمەڵگادا) ڕێکخرا

ئەمڕۆ بەرواری ٦-٨-٢٠٢٤ لەلایەن بەشێک لە بۆردی سەرپەرشتیارانی پڕۆگرامی پێنجوێن شاری فێربوونەوە قەڵغانی سوپاس و ڕێزلێنان و بەردەوامی بەخشرایە بەڕێز (زانا رحمان رحیم) قائمقامی پێشوی پێنجوێن و سەرپەرشتیاری گشتی پڕۆگرام پێنجوێن شاری فێربوون لەپای ئەو ئەرک و پشتگیری و ماندووبونەی بەڕێزیان لە چوارچێوەی پڕۆگرامی پێنجوێن شاری فێربووندا ئەنجامیانداوە، لەهەمانکاتیشدا داوا لەبەڕێزیان کرا کە بەردەوامبن لە کارکردن لە پڕۆگرامەکەدا و هاوکات بە خۆشحاڵیەوە بەڕێزیان کە دڵنیاییان دایە بۆردی باڵای پڕۆگرامەکە بەوپەڕی توانایانەوە بەردەوام دەبن لەکارکردن لە پڕۆگرامی پێنجوێن شاری فێربووندا...

بەرواری ٥-٨-٢٠٢٤ سەردانی بۆردی باڵای پڕۆگرامی پێنجوێن شاری فێربوون بۆ قائمقامیەتی پێنجوێن بەمەبەستی پیرۆزبایی دەست بەکاربوونی بەڕێز (هێمن ئیبراهیم)وەک قائم قامی پێنجوێن بەوەکالەت، لەسەردانەکەدا وێڕای پیرۆزبایکردنی بۆردی باڵای پڕۆگرام بۆ قائمقامی نوێ جەخت لەسەر ئەوە کرایەوە کە قائمقامی نوێ وەک سەرپەرشتیاری گشتی پڕۆگرامی پێنجوێن شاری فێربوون درێژە پێدەری کارەکانی پێشوتری پڕۆگرامەکەبێت، لەکۆتایشدا ئەندامانی ئامادەبووی بۆردی باڵای پڕۆگرام سوپاسی بەڕێز ئائمقامی نوێیانکرد بۆ ئەو پێشوازی و بەدەمەوەهاتنەی بەڕێزیان، هاوکات بەڕێز هێمن ئیبراهیم بەڵێندا کە بەوپەڕی توانایان هاوکاری و هەماهەنگی پڕۆژەی پڕۆگرامی شاری فێربوون دەبن

بەرواری (٣١/٧/٢٠٢٤)لە بەشی خوێندنەوەی کتێب و پێشکەش کردنی پوختەی کتێب. بەڕێزان (ئەوین سامان ،ئاڤان سامان،ڕەیان ڕەوف) هەڵسان بە پێشکەش کردنی سیمینارێک لە پوختەی ئەو کتێبانەی خوێندبویانەوە،ناوی کتێب( کەسێتی سەرکەوتوو-بێسەرپەرشتان-شێوازی گفتوگۆکردن) وە لە کۆتایشدا پێشکەش کردنی چەندین کتێب بە پڕۆگرامی پێنجوێن شاری فێربوون لە لایەن بەڕێزان. نیگا بەکر لەنیا بەختیار

لە ڕێکەوتی ٢٤-٧-٢٠٢٤، سیمینارێکی پەروەردەیی گرنگ بە ناونیشانی "پەروەردە لە سەردەمی ئێستادا" لەلایەن مامۆستا تریفە جەلال ساڵحەوە پێشکەشکرا. سیمینارەکە بە ئامادەبوونی ژمارەیەکی بەرچاو لە خانمان و دانیشتووانی شاری پێنجوێن بەڕێوەچوو، کە بە گەرموگوڕییەوە پێشوازییان لەم بابەتە گرنگە کرد. لە میانەی سیمینارەکەدا، مامۆستا تریفە جەلال باسی لە نوێترین شێوازەکانی پەروەردە و گرنگی گونجاندنیان لەگەڵ سەردەم کرد، لەگەڵ پێشکەشکردنی ڕێنمایی پراکتیکی بۆ ئامادەبووان سەبارەت بە چۆنیەتی مامەڵەکردن لەگەڵ ئاڵەنگارییەکانی پەروەردەی هاوچەرخ.

لە ئێوارەیەکی پڕ لە زانست و مەعریفە، ژوورە فراوانەکەی کتێبخانەی گشتی پێنجوێن پڕ بوو لە خانمانی خاوەن ئیرادە کە ئامانجیان فێربوونی نهێنییەکانی پەروەردەی منداڵ بوو. ئەمەش لە ڕێکەوتی ١٠-٦-٢٠٢٤ لە سیمینارێکدا بوو کە د.محمدخانی، پسپۆڕی بواری پەروەردە، بە ناونیشانی "بەخێوکردن و پەروەردە" پێشکەشی کرد. بە شێوازێکی زانستی و کاریگەر، د.محمدخانی باسی لە کۆڵەکە سەرەکییەکانی پەروەردەی سەرکەوتوو کرد و ڕووناکی خستە سەر ڕۆڵی ناوازەی دایکان لە دروستکردنی نەوەیەکی هاوسەنگ و توانادار. سیمینارەکە تەنها وانەیەک نەبوو، بەڵکو گفتوگۆیەکی کراوە بوو لە نێوان د.محمدخانی و بەشداربووان کە تێیدا ئەزموون و کێشەکانیان هاوبەش کرد.

لە ڕێکەوتی ١٠-٦-٢٠٢٤، پڕۆگرامی پێنجوێن شاری فێربوون لە کتێبخانەی گشتی پێنجوێن میوانداری سیمینارێکی تایبەت بە ناونیشانی "هونەری دایکایەتی" کرد کە لەلایەن د.محمدخانییەوە پێشکەش کرا. ئەم سیمینارە کە ئاڕاستەی خانمانی دانیشتووی پێنجوێن کرابوو، تیشکی خستە سەر چەندین لایەنی گرنگی پەیوەندیدار بە ڕۆڵی دایکان لە پەروەردەکردنی منداڵ و گرنگی فێربوونی هونەرەکانی دایکایەتی. بەشداربووان دەرفەتی ئەوەیان هەبوو ڕاستەوخۆ پرسیار و تێبینییەکانیان لەگەڵ پێشکەشکار بخەنەڕوو و سوود لە ئەزموون و زانیارییەکانی د.محمدخانی وەربگرن. ئەم چالاکییە بەشێکە لە زنجیرەیەک سیمینار و چالاکی کە پڕۆگرامی پێنجوێن شاری فێربوون بە مەبەستی بەرزکردنەوەی ئاستی هۆشیاری کۆمەڵایەتی و پەروەردەیی لە ناوچەکەدا پێشکەشی دەکات.

ئەمڕۆ ڕێکەوتی ٣- ٦-٢٠٢٤بەڕێز جەمال جەلال مەحمود پێنجوێنی، لەسەردانێکییدا بۆ شارۆچکەی پێنجوێن وەک سەرمایەداری نیشتیمانی ، چەند پڕۆژەیەکی گرنگی لە پێنجوێن ڕاگەیاند ئەوانیش: ١. دروستکردنی پردێکی پەڕینەوە بۆ خوێندکارانی گەڕەکەکانی کانی گوێژ و ناوشاخان ٢. دروستکردنی لۆگۆیەک وەک ناسنامەی شاری پێنجوێن لە دەروازەی شار ٣. نۆژەنکردنەوە و فراوانکردنی بەشی فریاکەوتن لە نەخۆشخانەی گشتی ٤. پشتگیری کردنی پڕۆگرامی "پێنجوێن شاری فێربوون" ٥- بڕیاریشدا لە ئایندەدا قوتابخانەیەک دروستبکات. هەروەها بڕیاری داوە دەروازەی شاری پێنجوێن دووسایدە بکات. ئامانجی سەرەکی، یەکخستنی هەموو تواناکانە بۆ ئەوەی پێنجوێن بکرێت بە یەکێک لە قەزا پێشەنگەکانی هەرێمی کوردستان لە بواری پەروەردەیی و خزمەتگوزاریدا، وەک چۆن ئێستا لە بواری کۆمەڵایەتی، کلتوری و فەرهەنگیدا پێشەنگە.