چالاکییەکان

پێنجوێن - پڕۆگرامی پێنجوێن شاری فێربوون ئەمڕۆ یەکشەممە، ١٩ی تشرینی یەکەمی ٢٠٢٥، سیمینارێکی تایبەتی لەژێر ناونیشانی "سێگۆشەی پەروەردە: خوێندکار و مامۆستا و خێزان" بەڕێوەبرد. ئەم چالاکییە پەروەردەییە کە لە کاتژمێر ٢:٠٠ی پاشنیوەڕۆدا لە هۆڵی پڕۆگرامی پێنجوێن شاری فێربوون لە نهۆمی دووەمی کتێبخانەی گشتی پێنجوێن ئەنجامدرا، بە ئامانجی پتەوکردنی پەیوەندی نێوان سێ پایەیی سەرەکیی پرۆسەی پەروەردە - خوێندکاران، مامۆستایان و خێزانەکان - ڕێکخرابوو. بەڕێز دکتۆر محەمەد خانی وەک بێژەری سەرەکیی، بابەتە پەروەردەییەکانی شیکردەوە و ڕێنماییە بەسوودەکانی پێشکەش کرد بۆ دروستکردنی ژینگەیەکی پەروەردەیی باشتر. ئامادەبوانی سیمینارەکە توانیان تێگەیشتنی قووڵتر بەدەست بهێنن لەسەر ڕۆڵی هەر یەک لەم سێ لایەنە لە سەرکەوتنی پرۆسەی خوێندن و فێربوون. ئەم بەرنامەیە بەشێکە لە چالاکییە بەردەوامەکانی پڕۆگرامی پێنجوێن شاری فێربوون بۆ بەرزکردنەوەی ئاستی پەروەردە لەم شارەدا.

پێنجوێن ٢١-٩-٢٠٢٥ دکتۆر محمدخانی خولێکی تایبەتی لێهاتوویی تواناکانی بەڕێوەبرد لەپێنجوێن شاری فێربووندا، دکتۆر محمدخان خولێکی چوار کاتژمێری تایبەت بە پەرەپێدانی لێهاتوویی تواناکانی بەڕێوەبرد کە بە تەنها بۆ ئەندامانی پڕۆگرامی پێنجوێن شاری فێربوون تەرخان کرابوو. ئەم خولە بەمەبەستی بەهێزکردنی توانا و لێهاتووییەکانی خۆبەخشانی پڕۆگرامەکە ئەنجامدرا، ئەوانەی کە لەماوەی دوو ساڵی ڕابردوودا بە چالاکی لەم پڕۆگرامەدا بەشداریان کردبوو. ئەم هەنگاوە وەک بەشێک لە پلانی بەردەوامی پەرەپێدانی کارمەندان و خۆبەخشان لە پڕۆگرامی پێنجوێن شاری فێربوون دادەنرێت.

سیمینارێکی تایبەت لەسەر "بەها ڕەوشتیەکان" بە هاوبەشی پڕۆگرامی پێنجوێن شاری فێربوون و فێرگەی وەرزشی (گەشە) بەڕێوەچوو لە لایەن ڕاهێنەر (محمد میرانی). ئەم سیمینارە پێشکەشکرا، چالاکییەکی تایبەت بوو بەمنداڵان و یاریزانانی فێرگەی وەرزشی (گەشە) بۆ پەروەردەکردنی بەهاکانیان لە ڕووی ڕەوشتیەوە. سوپاسی بێ پایان بۆ مامۆستا (عبداللە عمر) ڕاهێنەری فێرگەی گەشە بۆ هەماهەنگی و ڕێکخستنی ئەم چالاکییە گرنگە پەروەردەییە .

ئەمڕۆ ٢٥-٨-٢٠٢٥ دووشەممە خولی تایبەتی دووڕۆژەی "شکۆمەندی و متمانە بەخۆبوون" بە بەشداری چڕی هاونیشتمانیان لە پێنجوێن کۆتایی هات. خولەکە لەلایەن دکتۆر محیالدین محمدخانی، ئەندامی بۆردی باڵای پڕۆگرامی پێنجوێن شاری فێربوون، پێشکەش کرا و تەرکیز لەسەر گەشەپێدانی شکۆمەندی کەسایەتی و بەهێزکردنی متمانە بەخۆبوون کردبوو. لە کۆتاییدا بڕوانامەی بەشداری بەخشرایە سەرجەم بەشداربووان و هاوکات قەڵغانی سوپاس و پێزانینی تایبەتی پێنجوێن شاری فێربوون بەخشرایە بەڕێز دکتۆر محمدخانی لەپای ماندووبوونی بەڕێزیان لەم خولەدا. پڕۆگرامی پێنجوێن شاری فێربوون بەردەوامە لە پێشکەشکردنی ئەم جۆرە دەرفەتانەی فێربوون بۆ هاونیشتمانیان.

ئەمڕۆ بە بەشداری چڕی هاونیشتمانیان ، خولی تایبەتی دووڕۆژەی "شکۆمەندی و متمانە بەخۆبوون" لە کتێبخانەی گشتی پێنجوێن دەستی پێکرد. پێشکەشکار: دکتۆر محیالدین محمدخانی - ئەندامی بۆردی باڵای پڕۆگرامی پێنجوێن شاری فێربوون بەروار: ٢٤-٢٥ی ئابی ٢٠٢٥ کاتەکان: بەیانی: ٨:٣٠ - ١١:٠٠ پاشنیوەڕۆ: ٢:٠٠ - ٤:٣٠ شوێن:کتێبخانەی گشتی پێنجوێن - نهۆمی دووەم ئامانجەکانی خولەکە: ئەم خولە تایبەتە بە ڕاهێنانی پراکتیکی کاریگەر بۆ ئەو کەسانەی کە دەیانەوێت: باشتر خۆیان بناسن متمانەیان بەخۆیان بەهێزتر بکەن تواناکانی شکۆمەندی کەسایەتییان گەشە پێبدەن تایبەتمەندی: خولەکە بە تەواوی بێبەرامبەرە و لەلایەن پڕۆگرامی پێنجوێن شاری فێربوون پاڵپشتی دەکرێت. پڕۆگرامی پێنجوێن شاری فێربوون وەک دامەزراوەیەکی پاڵپشتیکەر، بەردەوامە لە پێشکەشکردنی دەرفەتەکانی فێربوون و گەشەپێدانی توانا و لێهاتوویەکان بۆ هاونیشتمانیانی ناوچەکە.

ئەمڕۆ ١٨/ ٨/ ٢٠٢٥ لە کتێبخانەی گشتیی پێنجوێن پێشبڕکێی تایبەت بە هونەری وێنەکێشان لەلایەن پڕۆگرامی پێنجوێن شاری فێربوونەوە بە سەرکەوتوویی ئەنجام درا. پێشبڕکێیەکە بەسەرپەرشتی هەردوو مامۆستای پسپۆڕ (مامۆستا ئاسیا حەمە شریف و مامۆستا شوکریە غفور)ەوە و بە هاوکاری کاک ( ڕێکار حەمە ڕەشید) وەک شارەزای بواری وێنەکێشان ، بۆ کۆمەڵێک بەهرەمەندی بەتوانای شێوەکاری شارەکە بەڕێوەبرا و دواتر خەڵاتی ڕێزلێنان بەخشرایە سەرجەم بەشداربووانی پێشبڕکێیەکە شایەنی باسە ئەم کارە یەکێکە لە هەوڵەکانی پرۆگرامی پێنجوێن شاری فێربوون بۆ گرنگی دان بە بواری شێوەکاری شانبەشانی بوارەکانی تری هونەر لە شارەکەدا.

٢٣-٧-٢٠٢٥ - چوار شەممەلە لایەن ڕێپێدراوی هاوتوچۆ (ئارام حسین علی)بە هاوکاری بەشی هاتوچۆی پێنجوێنناساندن و پیشاندانی هێماکانی هاتۆچۆمەبەست لێ بەرزکردنەوەی ئاستی هۆشیاری منداڵان لە هاتوچۆ و پاراستنی لە شەقامەکان.پاش کۆتاییهاتنی وانەکە لەلایەن بۆردی باڵای پرۆگرامی پێنجوێن شاری فێربوونەوە سوپاس و ڕێز بەخشرایە بەڕێز ڕێپێدراوی هاوتوچۆ (ئارام حسین علی)زیاتر ببینە

ئەمڕۆ ڕێکەوتی ٢١-٧-٢٠٢٥ کۆتایی بەخولێکی سێ ڕۆژی بەناونیشانی (ناسینی کەسێتی هات) کە لە لایەن بەڕێز ڕاهێنەری خۆبەخش ئاراس کریم پێنجوێنییەوە پێشکەشکرا، وێڕای سوپاس و پێزانین بۆڕاهێنەری خول و بەشداربوووان لەکۆتاییدا بڕوانامەی بەشداری بەخشرایە سەرجەم بەشداربوانی خول بەستەری ڤیدیۆ

لە ڕووداوێکی پەروەردەیی گرنگ و درێژەی چالاکیەکانیدا ، ئەمڕۆ شەممە ڕێکەوتی ١٨/٠٧/٢٠٢٥ پڕۆگرامی پێنجوێن شاری فێربوون خولی "ناسینی کەسێتی"دەستی پێکرد.ئەم خولەبێ بەرامبەرە و لەلایەن مامۆستا ئاراس کەریم پێنجوێنی ،ڕاهێنەری(GATQ)و ئەندامی ئەکادیمی بۆ ڕاهێنان،بەرپرسیاریەتی وانەکانی ئەم خولەی گرتووتە ئەستۆ.خولەکە بۆ ماوەی ٣ ڕۆژ (٩ کاتژمێر) بەردەوام دەبێت و پاش نیوەڕوان لە کاتژمێر ٢ تا ٥ ئێوارە ئەنجام دەدرێت. خولەکە تا ڕۆژی دووشەممە ٢١/٠٧/٢٠٢٥ بەردەوام دەبێت.خولەکە گشتگیرە بۆ بەشداربوونی مامۆستایان، فەرمانبەران، خوێندکاران، قوتابیان و چین و توێژە جیاوازەکانی کۆمەڵگە ،

پێنجوێن - ئەمڕۆ ٢٩ی حوزەیرانی ٢٠٢٥، خولێکی تاییبەت بە فێربوونی بنەماکانی داتابەیس کە بە ماوەی ٥ ڕۆژ و ١٥ کاتژمێر بەڕێوەچوو، بە سەرکەوتوویی کۆتایی هات. ئەم خولە کە لەسەر بنەمای بەرنامەی مایکرۆسۆفت ئەکسێس (Microsoft Access) ئامادە کرابوو، ئامانجی فێرکردنی زانیاریی بنەڕەتی و کاریگەری لەبارەی دروستکردن و بەڕێوەبردنی داتابەیسەوە بوو. بەشداربووان لە ماوەی ١٥ کاتژمێردا چۆنیەتی کارکردن لەگەڵ یەکێک لە گرنگترین بەرنامەکانی بەڕێوەبردنی داتایان فێربوو. خولەکە لەلایەن بەڕیز مامۆستا (هیوا عمر حسن) مامۆستای زانکۆوە پێشکەش کرا، کە بە شارەزاییەکی بەرز و شێوازێکی کاریگەر بابەتەکانی خولەکەی ڕوونکردەوە. لە کۆتایی خولەکەدا، هەموو بەشداربووان بڕوانامەی بەشداریی خۆیان وەرگرت، کە بەڵگەیەکی فەرمییە بۆ ئەوەی کە بە سەرکەوتوویی خولەکەیان تەواو کردووە و توانای کارکردنیان لەگەڵ مایکرۆسۆفت ئەکسێس بەدەستهێناوە. بەشداربووان زۆر سوپاسی بەڕیز مامۆستا هیوا عمر حسنیان کرد بۆ ووتنەوەی ئەم خولە سوودبەخشە، هەروەها هیوای سەرکەوتنی زیاتریان بۆ لە کارە ئاکادیمی و پیشەییەکانیدا خواست. ئەم جۆرە خولانە گرنگییەکی زۆریان هەیە لە پەرەپێدانی توانای کارمەندان و قوتابیان لە بواری تەکنەلۆژیادا، بەتایبەتی لە بواری بەڕێوەبردنی داتاکاندا کە یەکێکە لە بواری گرنگەکانی سەردەمی ئێستا.

پسپۆڕێکی زیرەکی دەستکرد ڕۆشنایی خستە سەر گرنگترین بابەتەکانی ئەم تەکنەلۆژیا نوێیە لە هەوڵێکدا بۆ بەرزکردنەوەی ئاگاداری و زانیاری خەڵک لەبارەی یەکێک لە گرنگترین تەکنەلۆژیاکانی سەردەمی ئێمە، سیمینارێکی تایبەت بەڕێوەچوو بەناونیشانی "زیرەکی دەستکرد و کاریگەرییەکانی لەسەر بوارەکانی ژیان". سیمینارەکە لەلایەن (مامۆستا هیوا عمر حسن)ەوە پێشکەش کرا، کە خاوەنی بڕوانامەی ماستەری زیرەکی دەستکردە و پسپۆڕیتی زۆری لەم بوارەدا هەیە. ناوەڕۆکی سیمینارەکە سیمینارەکە تیشکی خستە سەر: - پێناسە و بنەماکانی زیرەکی دەستکرد - جۆرەکانی زیرەکی دەستکرد و بەکارهێنانەکانی - کاریگەری ئەم تەکنەلۆژیایە لەسەر بوارە جیاوازەکانی ژیان وەک: - تەندروستی و چارەسەری نەخۆشی - پەروەردە و فێرکردن - بازرگانی و ئابووری - هونەر و داهێنان - کارەکان و بازاڕی کار لەگەڵ چەندین بواری دیکەی ژیان. ئەم سیمینارە لە کاتێکدا بەڕێوەچوو کە زیرەکی دەستکرد بووەتە بەشێکی جیانەکراوەی ژیانی ڕۆژانەمان، لە تەلەفۆنە زیرەکەکانەوە تا سیستەمە پێشکەوتووەکانی چارەسەری و بەڕێوەبردن. ئەم جۆرە سیمینارانە ڕۆڵێکی گرنگ دەگێڕن لە ئامادەکردنی کۆمەڵگا بۆ ئایندەیەکی پڕ لە تەکنەلۆژیای زیرەکی دەستکرد

پێنجوێن - ١ حوزەیران ٢٠٢٥ ئەمڕۆ لە هۆڵی پێنجوێن شاری فێربوون لە کتێبخانەی گشتی پێنجوێن، سیمینارێک بەناونیشانی "چۆن ئەفکارەکانمان ئەتوانن نەخۆشمان بخەن، ئاواش ئەتوانن ساڕێژمان بکەن" ئەنجامدرا. ئەم سیمینارە لەلایەن پڕۆگرامی پێنجوێن شاری فێربوونەوە ڕێکخرابوو و بەڕێز محمد مام غفوور ڕاهێنەری نێودەوڵەتی و خاوەنی بڕوانامەی ئەکادیمی (بریجمەن)ی هۆڵەندی. بە بەشداری ژمارەیک لە دانیشتوانی شاروکەی پێنجوێن لە سیمینارەکەا تیشک خرایە سەر کاریگەری بیرکردنەوە و ئەفکار لەسەر تەندروستی جەستەیی و دەروونی مرۆڤ. سیمینارەکە لە چوارچێوەی هەوڵەکانی پێنجوێن شاری فێربوونە بۆ بەرزکردنەوەی ئاستی هۆشیاری کۆمەڵایەتی و گەشەپێدانی کەسایەتی دانیشتوان ئەنجامدرا.

لە ڕۆژی پێنجشەممە، ٢٩ی ئایاری ٢٠٢٥دا، سیمینارێکی پەروەردەیی بەناونیشانی "شۆفێرێکی پەروەردەیی بەرپرسیار" لە شارۆچکەی پێنجوێن بەڕێوەچوو. ئەم چالاکییە پەروەردەییە لەلایەن دکتۆر محمدخانییەوە پێشکەشکرا. سیمینارەکە بەئامادەبوونی ژمارەیەکی بەرچاوی دانیشتوانی شارۆچکەکە بەڕێوەچوو، دکتۆر محمدخانی لە قسەکانیدا جەختی لەسەر گرنگی مامەڵەی ڕێزدارانە لەگەڵ هاووڵاتیان و بەکارهێنانی شێوازەکانی لێخوڕینی سەلامەت کردەوە. هەروەها باسی لە ڕۆڵی گرنگی شۆفێران لە دروستکردنی کۆمەڵگەیەکی سەلامەت و و یاساپەروەر کرد. ئەم جۆرە چالاکییانە بەشێک لە هەوڵەکانی بەرزکردنەوەی ئاستی هۆشیاری کۆمەڵایەتی لە شارۆچکەی پێنجوێن دادەنرێت، کە ئامانجی دروستکردنی ژینگەیەکی سەلامەتتر بۆ هەموو بەکارهێنەرانی ڕێگاکانە. #penjwen_learning_city #پێنجوێن_شاری_فێربوون #فێرکردن #پەروەردە #پێنجوێن_شاری_فێربوون #پەروەردە #فێرکردن #penjwen #penjwen_learning_city

"وەرزش و لێبوردەیی دوو باڵی یەکن کە بە هەردووکیانەوە دەتوانین بفڕین بەرەو ئاسۆیەکی باشتر. کاتێک ئەم گیانە لە خێزان، قوتابخانە، و کارەکانماندا بەکار دەهێنین، کۆمەڵگایەکی پتەوتر و میهرەبانتر دروست دەکەین." پێنجوێن - ٢٩ ئایاری ٢٠٢٥ بەرێز دکتۆر محمدخانی، شارەزای وەرزش و زانستە مرۆییەکان، ڕۆژی پێنجشەممە لە شارۆچکەی پێنجوێنی سلێمانی سیمینارێکی تایبەتی ڕاگرت کە تیایدا باسی گرنگی گیانی وەرزشی و ڕۆڵی لێبوردەیی لە ژیانی ڕۆژانەدا کرد. ئەم سیمینارە کە لە لایەن پڕۆگرامی پێنجوێن شاری فێربوونەوەوە ڕێکخرابوو، ژمارەیەکی بەرچاوی لە هاونیشتمانیان و وەرزشدۆستانی ناوچەکە ئامادەبوون. بەشداربووان لە تەمەنی جیاجیا و پیشەی جۆراوجۆرەوە بوون کە هەموویان خولیایی گوێگرتن لە بابەتە کردییە گرنگەکانی دکتۆر محمدخانی دەرکەوت. ناوەڕۆکی سیمینارەکە: دکتۆر محمدخانی لە قسەکانیدا جەختی لەسەر چەند خاڵێکی سەرەکی کردەوە: گیانی وەرزشی وەک بنەمای گەشەسەندن: دکتۆرەکە ڕوونی کردەوە کە گیانی وەرزشی تەنها بۆ یارییەکان نییە، بەڵکو شێوازێکی ژیانە کە دەبێت لە هەموو کارەکانماندا بەکاری بهێنین. ئەو ئاماژەی بە گرنگی پابەندبوون، یاری تیمی، و هەوڵدان بۆ باشتربوون کرد. لێبوردەیی وەک هێزێکی گۆڕان: لە بەشێکی گرنگی قسەکانیدا، دکتۆر محمدخانی باسی ئەوەی کرد کە لێبوردەیی چەقۆ نییە، بەڵکو هێزێکی گەورەیە کە دەتوانێت کەسەکان و کۆمەڵگا بگۆڕێت. ئەو نموونەی لە ژیانی کەسایەتییە گەورەکانی مێژوو هێنایەوە کە بە لێبوردەیی توانیویانە گۆڕانکارییەکی ئەرێنی بهێنن. ئەم سیمینارە کە بە شێوەیەکی سەرکەوت ئەنجام درا، نیشانەیەکی روونە لە خولیا و پێگەیشتنی هاونیشتمانیانی پێنجوێن بۆ بابەتە گرنگەکانی گەشەسەندنی کەسایەتی و کۆمەڵایەتی

پێنجوێن - ٨ی ئایاری ٢٠٢٥ ئەمڕۆ لە مەراسیمێکی تایبەتدا، قوتابخانەیەکی چۆڵکراوی قەزای پێنجوێن کە ماوەیەک بوو بەکارنەهێنرابوو، بەهۆی کۆنی بیناکەوە، دوای تەواوبوونی پڕۆسەی نۆژەنکردنەوە، بە فەرمی کرایەوە وەک دواناوەندی سێکوانی ئێواران. لە مەراسیمی کردنەوەکەدا، سەرپەرشتیارانی پڕۆگرامی "پێنجوێن شاری فێربوون" لەگەڵ قائمقامی قەزای پێنجوێن و بەڕێوەبەری پەروەردەی پێنجوێن و ژمارەیەک لە کەسایەتی ناوچەکە ئامادەبوون و لەسەر گرنگی ئەم هەنگاوە بۆ پەرەپێدانی کەرتی خوێندن لە ناوچەکە جەختیان کردەوە. بەڕێوەبەری پڕۆگرامی پێنجوێن شاری فێربوون لە وتەیەکدا ڕایگەیاند: "ئەمڕۆ بە کردنەوەی ئەم قوتابخانەیە، هەنگاوێکی گرنگمان نا بۆ فراوانکردنی دەرفەتەکانی خوێندن بەتایبەت بۆ ئەو کەسانەی کە پێشتر نەیانتوانیوە درێژە بە خوێندن بدەن. بەم هەنگاوە، ئێمە توانیمان بینایەیەکی چۆڵکراو بگەڕێنینەوە بۆ خزمەتکردنی کۆمەڵگا." شایانی باسە کە نۆژەنکردنەوەی قوتابخانەکە چەندین مانگی خایاندووە و تێیدا هەموو پێداویستییەکانی خوێندن دابین کراون. جێی ئاماژەیە ژمارەیەکی بەرچاو لە خوێندکاران و فێرخوازان شارۆچکەی پێنجوێن سودمەند دەبن لەم دواناوەندییە . لەلایەن سەرپەرشتیاری یەکەمی پەروەردەی پێنجوێن قەڵخانی سوپاس و ڕێز بەخشرایە پرۆگرامی پێنجوێن شاری فێربوون